I whakahaerehia ngā wānanga rongoā Māori e ngā mātanga o Tūpuna Remedies me Native Arts Aotearoa, he mea whakawhanake i te mātauranga Māori, te mahi rongoā me te whakapakari i te reo Māori me ōna tikanga.
Nā te pai hoki i ā-rātou mahi i ngā rangi e rua i tū rangatiraai te kaupapa, he mea kōmirimiri i ngā taonga tuku iho.
Ā, ko tētahi o ngā whāinga matua hei whakakikī i te kete mātauranga o ngā kairongoā kia whānui te titiro ki ētahi atu o ngā āhuatanga o te rongoā, pēra i te:
- Whānaungatanga,
- Katakata,
- Awhi tangata,
- Tamanui-te-Rā me āna painga,
- Te moana,
- Ngā tini hua o te taiao e ora ai te tangata.
Nā, i ruku hōhonu hoki i te ao o ngā taonga pūoro me te rongoā Māori, haunga anō i ngā kōrero paki e pā ana ki a Hine-pū-te-Hue. Nā ngā tohu me ngā akoranga i roto i te pūrākau i arahi nei i a Ngai Tātou, ko te mana whakaora o te oro me ngā ihirangaranga.
Koia tonu, ko te whakatīnanatanga o ngā taonga tuku iho, ko te hokinga mahara, ko te whaka-araara me te whakapakari i aua taonga.
Ā, nā te kaupapa mātou i akiaki kia tū hei kaitiaki, kia korikori te tīnana i te mau rākau hei oranga anō mō te tangata, me kī rā, kia puta atu i te hāneanea o te kāinga, ā, kia nohopuku hei āta wherawhera i te whakaaro kia tika ai.
He huarahi tēnei e mau ai anō i ngā taonga, te whakatupu i ngā reanga, te hokinga mahara me te whakamana i ngā tikanga i a tātou e tuputupu haere ana ki roto i te whakaaro kōtahi o te mahi rongoā.
Kei te tino tautoko tēnei kaupapa i Te Tarahiti o Te Tai-o-Awatea kia tatū hei waahi haumaru mō ngā whānau me ngā hāpori, putanoa i Te Tau Ihu me te mea anō hoki kia tūturu te whakahaere i ēnei tūmomo wānanga hei whakapiki ora kia tū pakari ai te tangata i roto i tōna mana motuhake me te tūāpapa o te whare ahurea Māori.gage in meaningful wānanga that uplift wellbeing, identity, and cultural grounding.
